ဂျပန်ရုပ်ရှင်ပွဲတော်မှာ ပြသထားတဲ့ ရုပ်ရှင်ဇာတ်ကား (၂၇)ကားအနက် ရုပ်ရှင် (၉)ကားကို ကြည့်ရှုပြီး ရုပ်ရှင်ရေးရာအရေးအသားများအဖြစ် ရေးသားကာ ယခုပြိုင်ပွဲမှာ ပေးပို့ပါဝင်နိုင်ပါတယ်။ ဇာတ်ကား ၉ ကားမှ မိမိနှစ်သက်ရာရုပ်ရှင်ကားကိုရွေးချယ်ကြည့်ရှုပြီး ရေးသားပေးပို့နိုင်ပါတယ်။ ပေးပို့လာတဲ့ အရေးအသားတွေကို အမှတ်ပေးစည်းမျဉ်းဖြင့် အကဲဖြတ်မှာဖြစ်ပြီး ဆု (၃) ဆု ချီးမြှင့်ဖို့ စီစဉ်ထားပါတယ်။ အသေးစိတ်အချက်အလက်တွေကတော့…

| ရုပ်ရှင်အနုပညာရေးရာ အရေးအသားဆု(Critics Award) |
ဂျပန်ရုပ်ရှင်ပွဲတော်တွင် ပြသထားသော ရုပ်ရှင်ကားများအနက် ဖော်ပြပါ ရုပ်ရှင်ဇာတ်ကား ၉ ကားအကြောင်းကို ရုပ်ရှင်အနုပညာ၊ အတတ်ပညာရှုထောင့်မှ ရေးသားနိုင်ပါသည်။ ရေးသားပေးပို့လာတဲ့ ရုပ်ရှင်အနုပညာရေးရာ အရေးအသားများထဲမှ အကဲဖြတ်အဖွဲ့က စိစစ်ရွေးချယ်ပြီး “ ရုပ်ရှင်အနုပညာရေးရာ အရေးအသားဆု(Critics Award)” အဖြစ် ချီးမြှင့်မည်ဖြစ်ပါသည်။

| ရုပ်ရှင်နှင့် ယဉ်ကျေးမှုရေးရာ အရေးအသားဆု(Culture Award) |
ဂျပန်ရုပ်ရှင်ပွဲတော်တွင် ပြသထားသော ရုပ်ရှင်ကားများအနက် ရွေးချယ်ထားတဲ့ ရုပ်ရှင်ဇာတ်ကား ၉ ကားအကြောင်းကို ရုပ်ရှင်နှင့် ယဉ်ကျေးမှုရေးရာရှုထောင့်မှ ရေးသားနိုင်ပါတယ်။ ရေးသားပေးပို့လာတဲ့ ရုပ်ရှင်နှင့် ယဉ်ကျေးမှုရေးရာအရေးအသားများထဲမှ အကဲဖြတ်အဖွဲ့က စိစစ်ရွေးချယ်ပြီး “ ရုပ်ရှင်နှင့် ယဉ်ကျေးမှုရေးရာ အရေးအသားဆု(Culture Award)” အဖြစ် ချီးမြှင့်မှာ ဖြစ်ပါတယ်။

| ရုပ်ရှင်ခံစားမှုရေးရာ အရေးအသားဆု(Appreciation Award) |
ဂျပန်ရုပ်ရှင်ပွဲတော်တွင် ပြသထားသော ရုပ်ရှင်ကားများအနက် ရွေးချယ်ထားတဲ့ ရုပ်ရှင်ဇာတ်ကား ၉ ကားအကြောင်းကို ရုပ်ရှင်ကြည့်ရှုခံစားသူရှုထောင့်မှ ရေးသားနိုင်ပါတယ်။ ရေးသားပေးပို့လာတဲ့ ရုပ်ရှင်ခံစားမှုရေးရာ အရေးအသားများများထဲမှ အကဲဖြတ်အဖွဲ့က စိစစ်ရွေးချယ်ပြီး “ ရုပ်ရှင်ခံစားမှုရေးရာ အရေးအသားဆု(Appreciation Award)” အဖြစ် ချီးမြှင့်မှာ ဖြစ်ပါတယ်။

အောက်ဖော်ပြပါ ဂျပန်ရုပ်ရှင်ဇာတ်ကား(၉)ကား မှ မိမိနှစ်သက်ရာရုပ်ရှင်ကားကိုရွေးချယ်ကြည့်ရှုပြီး ရေးသားရမှာပါ။ ဇာတ်ကားနာမည်နဲ့ စတင်ပြသမယ့်အချိန်ကို ဖော်ပြထားပါတယ်။ ဇာတ်ကားတစ်ကားစီကို စတင်ပြသတဲ့အချိန်မှ ၂၄နာရီအတွင်း ကြည့်ရှုနိုင်မှာ ဖြစ်ပါတယ်။

၁။ Lady Maiko (14.1.2021 နေ့လယ် ၂နာရီ)
၂။ Key of Life (14.1.2021 ညနေ ၄နာရီ)
၃။ 0.5 mm (16.1.2021 နေ့လယ် ၂နာရီ)
၄။ Tsukiji Wonderland (16.1.2021 ညနေ ၄နာရီ)
၅။ Peace (17.1.2021 နေ့လယ် ၂နာရီ)
၆။ Ecotheraphy Getaway Holiday (20.1.2021 နေ့လယ် ၂နာရီ)
၇။ Tokyo Marble Chocolate (20.1.2021 ညနေ ၄နာရီ)
၈။ Cafe Funiculi Funicula (21.1.2021 နေ့လယ် ၂နာရီ)
၉။ The Great Passage (21.1.2021 ညနေ ၄နာရီ)

| ပြိုင်ပွဲစည်းမျဉ်းစည်းကမ်းများ |

၁။ အရေးအသားများကို မြန်မာဘာသာစကားဖြင့် ရေးသားရမည်။

၂။ ပြိုင်ပွဲဝင်ရန် ရွေးချယ်ပေးထားသော ဇာတ်ကားများအားလုံးအကြောင်းကို ခြုံငုံကာ အဆက်အစပ်ရှိသော အရေးအသားတစ်ပုဒ်အဖြစ် လည်းကောင်း (တစ်ကားချင်းကို တစ်ပိုဒ်စီ အကျဉ်းရေးထားသည်မျိုး မဖြစ်ရ) ၊ ဇာတ်ကားတစ်ကားအကြောင်းကိုသော်လည်းကောင်း၊ အကြောင်းအရာ ဦးတည်ချက် (theme) ကို အခြေပြုပြီး ဇာတ်ကားအချို့အကြောင်းကို ရွေးချယ်၍ လည်းကောင်း ပြိုင်ပွဲဝင်အရေးအသား အဖြစ်ရေးသား၍ ယှဉ်ပြိုင်နိုင်သည်။ သို့မဟုတ် ဇာတ်ကားတစ်ကား အရေးအသားတစ်ပုဒ်အဖြစ် ရေးသား၍လည်း ပြိုင်ပွဲဝင် နိုင်ပါသည်။

၃။ အရေးအသားများကို အေဖိုး(A4)စာမျက်နှာ ၃ မျက်နှာအများဆုံး ရေးသားနိုင်သည်။ စာမျက်နှာ ၂ မျက်နှာနှင့် စာမျက်နှာ ၃ မျက်နှာကြားရေးသားဖို့အကြံပေးပါသည်။ ပြည်ထောင်စု ဖောင့်၊ ဖောင့်ဆိုဒ် ၁၁ ဖြင့် ရေးသားရမည်ဖြစ်ပြီး စာမျက်နှာပတ်ပတ်လည်ကို လက်မဝက်ချန်ထားပေးရမည်။

၄။ တစ်ပါးသူ၏ အရေးအသားများကို တစ်ပုဒ်လုံးသော်လည်းကောင်း၊ တစ်စိတ်တစ်ပိုင်းသော်လည်းကောင်း၊ အနည်းငယ် သော်လည်းကောင်း ကူးယူပေးပို့ခြင်း၊ မူပိုင်ခွင့်ဆိုင်ရာလိုက်နာသင့်သည်များကို ချိုးဖောက်ခြင်း၊ မြန်မာဘာသာစကားမဟုတ်သော အရေးအသားများကို ဘာသာပြန်ပေးပို့ခြင်းနှင့် မသမာသောနည်းလမ်းများဖြင့် ပေးပို့ယှဉ်ပြိုင်သော စာမူများကို လုံး၀ (လုံး၀)လက်ခံမည် မဟုတ်ပါ။ မသမာသောနည်းလမ်းဖြင့် ယှဉ်ပြိုင်သည်ဟု ပေါ်ပေါက်ပါက ပြိုင်ပွဲမှ ပယ်ဖျက်မည်ဖြစ်ပါ သည်။

၅။ ပြိုင်ပွဲဝင်သူ၏ အမည်၊ လိပ်စာ၊ ဖုန်း၊ အီးမေးလ် လိပ်စာများကို ပြည့်စုံစွာထည့်သွင်းဖော်ပြ၍ စာမူကို japanesefilmfestivalmyanmar@gmail.com သို့ ပေးပို့ရမည်။

၆။ ဂျပန်ဖောင်ဒေးရှင်း၊ ဂျပန်ရုပ်ရှင်ပွဲတော်နှင့် 3-ACT ရုပ်ရှင်မဂ္ဂဇင်း၏ အယ်ဒီတာအဖွဲ့တွင်ပါဝင်သူများသည် ပြိုင်ပွဲတွင် ပါဝင်ယှဉ်ပြိုင်ခွင့် မရှိပါ။

၇။ ပြိုင်ပွဲဝင်ရောက်လာသူများ၏ စာမူများကို 3-ACT ရုပ်ရှင်မဂ္ဂဇင်းက အမှတ်ပေးစည်းမျဉ်းနှင့် အညီ ဆုရွေးချယ်ချီးမြှင့်မည်ဖြစ်ပါသည်။

အမှတ်ပေးစည်းမျဉ်း

| Critics Award |
၁။ ရုပ်ရှင်အနုပညာအတတ်ပညာ၊ ရုပ်ရှင်သီအိုရီတစ်ရပ်ကို အခြေခံကာ ချဉ်းကပ်ပြရမည်ဖြစ်ပြီး ဇာတ်ကားမှ အနုပညာဖော်ပြချက် အရုပ်အသံများနှင့် မည်သို့ တည်ဆောက်ထားသည်ကို တိကျသေချာစွာ ထောက်ပြပြီး ရေးသားရမည်ဖြစ်သည်။
၂။ ဆုပါကိုင်ထားသော သီအိုရီနှင့် အတတ်ပညာရပ်များ၏ အနက်သဘောနှင့် အသုံးအနှုန်းမှန်ကန်ခြင်းဖြစ်ရမည်။
၃။ မြင်သာအောင် တင်ပြနိုင်ခြင်း ဖြစ်ရမည်။
၄။ ရုပ်ရှင်ပညာ၏ သဘောတရားကိုနားလည်ခြင်းရှိရမည်။
၅။ အရေးအသားနှင့် ဘာသာစကားကျွမ်းကျင်မှုရှိရမည်။

| Culture Award |
၁။ ရုပ်ရှင်ကားများတွင် တင်ပြထားသော ယဉ်ကျေးမှုနှင့် လူမှုစရိုက်ကို အခြေခံကာ ရေးသားနိုင်ရမည်။
၂။ ဂျပန်ယဉ်ကျေးမှုနှင့် ဂျပန်ရုပ်ရှင်ပညာအပေါ်သက်ရောက်သော လွှမ်းမိုးမှုကို မြင်သာအောင် ရေးသားရမည်။
၃။ ဂျပန်လူ့အဖွဲ့အစည်းနှင့် ယဉ်ကျေးမှုဓလေ့ကို လူမှုဗေဒ အမြင်ဖြင့် ချဉ်းကပ် သုံးသပ်ချက်အနည်းဆုံးတစ်ခုပါဝင်ရမည်။
၄။ မြန်မာ့ယဉ်ကျေးမှုနှင့် ယှဉ်တွဲကာ၊ တူညီချက်မတူညီချက်များမှတစ်ဆင့် အပြန်အလှန် နားလည်မှုကို တည်ဆောက်နိုင်သော အပြုသဘောဆောင်သည့် သုံးသပ်ချက်များပါဝင်ရမည်။
၅။ အရေးအသားနှင့် ဘာသာစကားကျွမ်းကျင်မှုရှိရမည်။

| Appreciation Award |
၁။ ရေးသားသူ၏ ကိုယ်ပိုင်အမြင်နှင့် အကြိုက်ကို ခိုင်လုံအောင်တင်ပြနိုင်ရမည်။
၂။ ကျိုးကြောင်းဆက်စပ်လေ့လာမှုနှင့် အမြင်ရှိရမည်။
၃။ ခြုံငုံတင်ပြကာ ရေးသူ၏ အမြင်ကို ထင်ရှားစွာ ရေးသားတင်ပြနိုင်မှုသဘောရှိရမည်။
၄။ ရုပ်ရှင်မှရရှိသောရသ ပေါ်လွင်စေရမည်။
၅။ အရေးအသားနှင့် ဘာသာစကားကျွမ်းကျင်မှုရှိရမည်။

| အမှတ်ပေးမည့်စနစ် |
၁။ ဆုတစ်ဆုစီအတွက် စုစုပေါင်း ရမှတ် ၅၀ ပေးမည်။
၂။ စည်းမျဉ်းတစ်ခုကို ၁၀ မှတ်ထားရှိမည်။
ထို ၁၀ မှတ်ကို ၂ မှတ်စီဖြင့် အဆင့် ၅ ဆင့် ထပ်မံစိတ်ပိုင်းမည်။
(၂.၁) လုံး၀မကောင်း (အနည်းဆုံး ၁ မှတ် – အများဆုံး ၂ မှတ်)
(၂.၂) လက်ခံနိုင် (အနည်းဆုံး ၃ မှတ် – အများဆုံး ၄ မှတ်)
(၂.၃) သာမန် (အနည်းဆုံး ၅ မှတ် – အများဆုံး ၆ မှတ်)
( ၂.၄) ကောင်း (အနည်းဆုံး ၇ မှတ် – အများဆုံး ၈ မှတ်)
(၂.၅) အကောင်းဆုံး (အနည်းဆုံး ၉ မှတ် – အများဆုံး ၁၀ မှတ်)