Hoo Fan Chon ကို ၁၉၈၂ ခုနှစ်တွင် မလေးရှား၊ Selangor ၌ ဖွားမြင်ခဲ့ပြီး ယခုလက်ရှိတွင် ပီနန်၊ George Town တွင် နေထိုင်လျက်ရှိသည်။ ၂ဝ၁၂ ခုနှစ်တွင် Run Amok Gallery ဟု အမည်ပေးထားသည့် စုပေါင်း အနုပညာဖန်တီးသူများအဖွဲ့ (art collective)ကို ပူးတွဲတည်ထောင်ခဲ့ပြီး ၂ဝ၁၇ခုနှစ်အထိ အဖွဲ့ဝင်တစ်ဦးအဖြစ် ပါဝင်ဆောင်ရွက်ခဲ့သည်။၂ဝ၁ဝ ခုနှစ်တွင် London College of Communication တွင် ဓာတ်ပုံပညာရပ်ဖြင့် ဘွဲ့ရခဲ့ပြီး ၂ဝ၁၅ ခုနှစ်မှ ၂ဝ၁၇ ခုနှစ်အထိ ဂျပန်ဖောင်ဒေးရှင်းအာရှစင်တာ၏ ကျူရေတာ workshop တွင် ပါဝင်ခဲ့ပြီးနောက် ထိုင်ဝမ်ရှိ No Man’s Land Residency Project – Nusantara Archive တွင် ၂ဝ၁၈ ခုနှစ်အထိ ပါဝင်ဆောင်ရွက်ခဲ့သည်။ တတိယအကြိမ်မြောက် Makassar Biennale ပြပွဲတွင် ပါဝင်ခဲ့ပြီး သူ၏ တစ်ကိုယ်တော် အနုပညာပြပွဲ ‘Biro Kaji Visual George Town’ ကို မလေးရှားတွင် ပြုလုပ်ခဲ့သည်။ မကြာသေးမီက ကွာလာလမ်ပူ “Ilham” အနုပညာပြခန်းတွင် ပြုလုပ်သည့် မလေးရှားနိုင်ငံ၏ ဓာတ်ပုံယဥ်ကျေးမှုကို ပြသသည့် ‘Bayangnya itu Timbul Tenggelam – Photographic Cultures in Malaysia’ ပြပွဲကို ပူးတွဲစီစဥ်ခဲ့သည်။ Fan Chon သည် သူ၏ အနုပညာလက်ရာများတွင် ယဥ်ကျေးမှုနှင့် လူ့အဖွဲ့အစည်းကို တည်ဆောက်ထားမှုနှင့် လူများ ယဥ်ကျေးမှုတစ်ခုမှ တစ်ခုသို့ ရွေ့ပြောင်းသွားသောအခါ တန်ဖိုးထားမှုတွေ ပြောင်းလဲသွားနိုင်ကြောင်းကို ဖော်ထုတ်ပြသသည်။ Fan Chon ၏ အနုပညာလက်ရာအများစုသည် ယဥ်ကျေးမှုများကို ဘာသာပြန်ဖို့ ကြိုးစားသည့် လုပ်ငန်းစဥ်များဖြစ်ပြီး တစ်ခါတစ်ရံတွင် မထင်မှတ်ထားသည့် အဖြေများ၊ ကျိုးကြောင်းမညီညွတ်သော ရလဒ်များလည်း ပါဝင်သည်။

Henry Tan သည် အနုပညာ၊ နည်းပညာပိုင်းဆိုင်ရာနှင့် ပတ်သတ်ပြီး ဝေမျှသင်ကြားပေးသူ၊ artist တစ်ဦးဖြစ်သည်။ ဘန်ကောက်တွင်အခြေစိုက်ပြီး Tentacles Art Space ၏ ပူးတွဲတည်ထောင်သူ၊ Freaklab, Thailand နှင့် metaPhorest Japan ၏ အဖွဲ့ဝင်တစ်ဦးဖြစ်သည်။ Henry သည် မီဒီယာကို အသုံးပြုပြီး အနုပညာဖန်တီးရာတွင် ကျွမ်းကျင်ပြီး သူသည် အနာဂါတ်ကာလရှိ လူသားများ၊ လူ့အဖွဲ့အစည်း၊ အခွင့်အလမ်းများနှင့် အနာဂါတ်ကမ္ယာကို အခြေပြုပြီး အနုပညာဒီဇိုင်းများကို ဖန်တီးသူတစ်ဦးဖြစ်သည်။ Henry ၏ အနုပညာလက်ရာများသည် ရွှံ့၊ စက္ကူ၊ ပလက်စတစ် အစရှိသည်တို့ဖြင့် ရိုးရာဟန်ပါအောင် ဖန်တီးထားသည့် လက်မှုပစ္စည်းများဖြစ်သည်။ abstract သဘောတရားကို အသုံးပြုပြီး အရာဝတ္ထုများ၏ ဒြပ်ဝတ္ထုဖြစ်တည်မှုကို အသုံးပြုပြီး ဖန်တီးသည်။ Henry သည် ကိုယ်ပိုင်အတွေ့အကြုံများ၊ လုပ်ငန်းခွင်မှ အမှတ်တရများကို အသုံးပြုပြီး ငယ်ဘဝ၊ စိတ်ကူးယဥ်ဆန်မှု၊ လူသားတို့၏ အခြေအနေ အစရှိသဖြင့် ခေါင်းစဥ် အကြောင်းအရာများဖြင့် အနုပညာလက်ရာများကို ပုံဖော်ဖန်တီးလျက်ရှိသည်။

အောင်မြတ်ဌေးသည် ရန်ကုန်အခြေစိုက် artist၊ writer ၊ အင်ဒီပန်ဒန့် ကျူရေတာ တစ်ဦးဖြစ်သည်။ ၁၉၉၈ ခုနှစ်တွင် ရန်ကုန်ယဥ်ကျေးမှုနှင့် အနုပညာတက္ကသိုလ်မှ ဘွဲ့ရခဲ့ပြီး ထိုတက္ကသိုလ်တွင် ၂ဝဝ၂ ခုနှစ်အထိ ကထိကအဖြစ် စာသင်ကြားတာဝန်ထမ်းဆောင်ခဲ့သည်။ ၂ဝဝ၅ ခုနှစ်မှစ၍ စာရေးဆရာ၊ ကျူရေတာအဖြစ် မြန်မာအနုပညာလောကထဲ့သို့ ဝင်ရောက်ခဲ့သည်။ ခေတ်ပြိုင်အနုပညာ contemporary art တွင် တွေ့ရသည့် လွတ်လပ်စွာထုတ်ဖော်ပြသနိုင်စွမ်းကို လေ့လာဖွေရှာခဲ့ပြီး လူအဖွဲ့အစည်းပြဿနာများအတွက် message ပေးရာတွင် ခေတ်ပြိုင်ဟန်ထည့်ထားသည့် ရိုးရာအနုပညာပုံစံများ၊ လက်ရာများဖြင့် တင်ဆက်ပြသခဲ့သည်။ အောင်မြတ်ဌေး၏ အနုပညာလက်ရာများသည် ထိုင်း၊ အိန္ဒိယ၊ ဂျပန်၊ အင်ဒိုနီးရှား၊ ဗီယက်နမ်၊ ဖိလစ်ပိုင် အစရှိသည့် အာရှနိုင်ငံများအပြင် ဟောင်ကောင်၊ ယူအက်စ် (US) တို့တွင်လည်း ပြသခြင်းခံခဲ့ရသည်။ အောင်မြတ်ေဌးသည် နိုင်ငံတကာရှိ အနုပညာရှင်များကို ဖိတ်ခေါ်သည့် Art residency program ပရိုဂရမ်များတွင်လည်း ဖိတ်ခေါ်ခြင်းခံခဲ့ရသည်။ သူသည် ၂ဝ၁၇ ခုနှစ်တွင် ပြုလုပ်ခဲ့သည့် “My Yangon, My Home” Art Heritage Festival ၏ public art section အတွက် ပြပွဲစီစဥ်သူအဖြစ် တာဝန်ယူဆောင်ရွက်ခဲ့သည်။ အောင်မြတ်ဌေးသည် SOCA (School of contemporary Arts) online program ကို တည်ထောင်သူဖြစ်ပြီး မကြာသေးမီက မြန်မာခေတ်ပြိုင်အနုပညာအကြောင်းကို သုတေသနစာတမ်းပြုထားသည့် “Silence is Golden” DVD မဂ္ဂဇင်း အတွဲ ၂ ကို ရေးသားထုတ်ဝေခဲ့သည်။